اساسيات المونتاج

كل ماتريد معرفته قبل بدايتك في مجال المونتاج

من ضمن الحاجات اللى بتتسأل في مجال المونتاج هي

– ازاي ابدأ في مجال المونتاج لأنه شغفي
-ازاي بعد ماتعلم الاقي شغل وانا معنديش اعمال سابقة ؟
-ازاي مضيعش وقتي واروح للعملا اللى فعلا محتاج الشغل مش بتجرب فيا .
-ازاي استلم فلوسي ؟

هنبدأ بالسؤال الاول وهو ازاي ابدأ في مجال المونتاج ؟

مجال المونتاج هو مجال موجود في كل حاجة متعلقة بالمحتوى اللى بيتم تقديمه فمثلا هتلاقي مجال المونتاج داخل في الافلام والمسلسلات والبرامج والاعلانات وحفلات الزفاف وغيرها من الفيديوهات وكل دي بتندرج تحت مسمى واحد وهو انك ازاي تبقى Storyteller . ودي بتيجي عن طريق الممارسة وانك يكون عندك تغذية بصرية
الفيلم ده ازاي الاحداث ماشية فيه
او فيديوهات اليوتيوب اللى انت بتتفرج عليها ايه الفيديو اللى بيشدك وبتكملوا للأخر وايه اللى بتمل منه وبتقفلوا .
ومن هنا تجيب ورقة وقلم وتكتب كل انتقال عجبك او كل ايفكت شايفه حلو وتبتدي تمارسه وتطبقه في الفيديو بتاعك بطرق مختلفة ( هيكون في فيديوهات ان شاء الله بتشرح ازاي تعرف اسم الايفكت اللى بتشوفه في الفيديو او الانتقال ) ولكن احنا هنا بنتكلم عن فكرة عامة وهي انك ازاي تبتدي في المجال وخطوة خطوة هنبتدي نتعلم ازاي نطبق الانتقالات والايفكتات المختلفة على الفيديوهات .

بالتالى الخلاصة انت محتاج انك تبقى عندك تغذية بصرية في كل نوع من انواع الفيديوهات اللى ممكن تشتغل فيها كمونتير بحيث تبقى جاهز ودي سهلة بالنسبة لك لأن كل الافلام دلوقتي بقت متوفرة ليك مجانا على النت وكمان المسلسلات وفيديوهات اليوتيوب . وكدة يبقى انتهينا من النقطة الاولى وهو تعريف بسيط عن المونتاج وازاي يبقى عندك تغذية بصرية .

بالتالي مهم جدا انك تفهم ال Storytelling واتفرج على عمرو سلامة على اليوتيوب بيشرح في قناة اسمها الافلامنجيه عن الموضوع ده ومواضيع تانية واكيد هتفيدك كمونتير في طريقك .

النقطة التانية وهي لازم يكون عندك معرفة باساسيات التصوير


انا برشحلك كورس مدفوع اسمه Fulltime Filmmaker لو انت عايز تستثمر في نفسك ولو عايز تبدأ بالمجاني فبرشحلك تبحث عن الاتي :

لو عايز محتوى عربي يبقى تبحث عن

– قاعدة التكوين
-انواع الكادرات

– الاضاءة ( ودي هي مش مهمة ليك بس على الاقل تتعلمها عشان ممكن تقول للعميل انه يظبط الاضاءة وكدة انت بتقدمله value لأنك بتحاول تطور من الشغل بتاعه )
-انواع المايكات ( ودي نفس الكلام مهمة انك تقوله انت ممكن تغير المايك بتاعك لمايك احسن زي مثلا في ناس بتشتغل بمايكات الكاميرا الداخلية وصوتها بيبقى طالع سيء جدا في حين انه ممكن يشتري حاجة اسمها lav mic وهتحسن الصوت وعلى فكرة ده كمان هيريحك كتير ومش هيتعبك وانت بتظبط الاوديو )

لو بالانجلش كل اللى هتعمله انك تترجم اللى هتبحث عنه بالعربي
-Rules of compositions
-camera angles
-Lighting
-types of mics

النقطة التالتة كبداية انك محتاج تتعلم البرنامج اللى تطبق عليه كل ده


لو معاك بادجت تقدر تشتري ادوبي بريمير او فاينال كات او برنامج افيد لو انت ماك
لو مش معاك تقدر تبدأ بدافنشي ريسولف وكان في مقالة انا شارح فيها ازاي تقدر تحصل على دافنشي ريسولف مجانا تقدر تتابعها من هنا
ودول الافضل من وجهة نظري واكيد انت ممكن تلاقي حاجة افضل ليك تشتغل عليها فاشتغل عليها مفيش مشكلة .

ازاي بعد ماتعلم الاقي شغل وخصوصا اني معنديش اعمال سابقة ؟

محتاج انك تكون صبور ومتستعجلش في انك تلاقي شغل النهاردة انت لسة بتبني البيزنس بتاعك وللعلم انت مخسرتش اي شيء ماديا انت بتخصص وليكن ساعتين يوميا تبني فيهم البيزنس بتاعك . يعني مفيش تعب جسدي ولا بتدفع اي فلوس . كل المعلومات السابقة متوفرة ليك بالمجان . كوباية شايك الجميلة واقعد اتفرج على اليوتيوب وافهم الدنيا ماشية ازاي .

اتعلمت وكل شيء بس مفيش شغل فعلي اشتغلته اتصرف ازاي ؟


في مبدأ اسمه Free to fee وهو انك بتبعت للعملا اللى انت شايفهم ان الفيديوهات بتاعتهم كويسة انك تبعت ليهم ايميل انك مستعد تشتغل الفيديوهات دي بالمجان مقابل انك تحطها في البورتفوليو الخاصة بيك وانك لو قدمت ليهم value وشافوا ان شغلك حلو يبقوا يشتغلوا معاك بمقابل مادي بعد كدة .
وانا متكلم عن المبدأ ده في مقالة منفصلة وذكرت فيها امثلة حقيقية حصلت بالفعل تقدر تتابع المقالة من هنا

الكلام ده عن تجربة بينجح مش بيفشل وفي عملا فعلا لما تلاقيك انك جاد وبتخلص شغل بكواليتي محترمة بيحترموك وبيقدروك ماديا وكمان بيرشحوك لعملا تانية .

الكلام ده مش منطبق على العملا بس . ممكن تشتغل لبيزنس خاص لاصحابك محتاجين لي فيديو او عائلتك ( كدة انت فهمت الفكرة ) .

كل ده بالمجان طب ولو عايز حاجة كواليتي عالي وعايز تدفع لبروجكتات حقيقية تمنتجها . يبقى تروح لموقع جميل اسمه Editstock
ده موقع متقسم بطريقة جميلة وفي كل انواع الفيديوهات اللى قلبك يحبها .
كمان انا شارح مقالة عن ازاي تقدر تشتغل بدون اعمال سابقة بالتفصيل تقدر تتابعها من هنا

كدة انت اتعلمت وحليت مشكلة انك معندكش اعمال سابقة .

في المقالة الجاية باذن الله هيتم شرح ازاي بقى تشتغل مع العملا الصح وازاي تستلم فلوسك

بالتوفيق للجميع ان شاء الله

اظهر المزيد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى